Hinn 82 ára gamli Svisslendingur segir að FIFA ætti bara að nota einn myndbandsdómara í stað fjögurra líkt og gert er nú. Þannig gætu ákvarðanir myndbandsdómaranna verið stöðugri.

Blatter var mættur á leik Portúgals og Marokkó en Portúgal vann þann leik 1-0. Marokkó hefði viljað fá meira út úr VAR en þeir fengu í þeim leik.

„Ég held að þetta sé ekki rétta aðferðin. Ég er ekki á móti því að dómarar fái hjálp. Við byrjuðum á því með marklínutækninni. Ég er ekki á móti tækninni en hún er óstöðug," sagði Blatter.

Blatter var forseti FIFA áður en hann var bannaður öllum afskiptum af fótbolta árið 2015 vegna ótal skandala.

Hann er hins vegar í Rússlandi þrátt fyrir bannið en Blatter og Vladimir Pútín, forseti Rússlands eru miklir mátar og er Blatter gestur Pútíns á meðan mótinu stendur.