Pablo Punyed, miðjumaður Stjörnunnar, hefur verið valinn í æfingahóp hjá landsliði El Salvador fyrir Mið-Ameríkukeppnina sem fer fram í Bandaríkjunum í næsta mánuði.
„Ég er mjög ánægður og einnig mjög spenntur. Ég hef aldrei verið valinn í landsliðið áður og því er þetta stórt skref fyrir mig. Þetta er auðvitað æfingahópur en vonandi næ ég að vinna mér sæti í 23 manna hópnum,“ sagði Pablo við Morgunblaðið í gær.
Pablo kom til Stjörnunnar frá Fylki síðastliðinn vetur en hann hefur staðið sig afar vel í sumar og verið einn af þeim leikmönnum sem hafa komið mest á óvart í Pepsi-deildinni.
Farid Zato miðjumaður KR hefur einnig verið valinn í landslið Tógó sem mætir Gínea 5. september og Gaana 10. september.
Báðir leikmennirnir fara út þegar landsleikjahlé er í Pepsi-deildinni og því munu þeir ekki missa af leikjum með sínum félagsliðum.
Athugasemdir