„Þetta eru mjög mikil vonbrigði og við þurfum að skoða vel hvað er í gangi hjá okkur. Við getum ekki haldið forystu þegar við náum henni. Það er eins og við dettum niður á eitthvað lægra plan og höldum að þetta sé komið,“ sagði Sóley Guðmundsdóttir, fyrirliði ÍBV, eftir 1-1 jafntefli við FH. Sóley var að vonum hundsvekkt með úrslitin og fannst liðið sitt ekki ná upp nægum hraða í leikinn.
Lestu um leikinn: FH 1 - 1 ÍBV
Mark ÍBV kom þó eftir vel útfærða og snarpa sókn en liðið náði ekki að fylgja því nægilega vel eftir.
„Þetta er það sem við höfum verið að tala um. Að ná meira tempó inná síðasta þriðjunginn og þegar við náum því þá gengur þetta vel en við erum ekkert mikið að skipta um gír í leiknum. Við erum svolítið á sama tempói.“
ÍBV-liðið hefur verið þungt á sér í síðustu leikjum og aðspurð segir Sóley að mögulega getið álag á fámennan leikmannahóp spilað þar inn í.
„Það er náttúrulega mjög mikið álag á okkur fyrstu ellefu og það er eðlilegt að við verðum þreyttar. Hausinn er svo svolítið á öðru en þessu þegar það er augljóst að Þór/KA er bara að sigla þessu heim og það er ekkert í boði fyrir nein önnur lið. Þá er hausinn kannski kominn svolítið á Laugardalsvöll en það má alls ekki vera þannig. Við viljum enda eins ofarlega og við getum í deildinni. Við þurfum að klára það almennilega líka.“
Nánar er rætt við Sóleyju í sjónvarpinu hér að ofan.
Athugasemdir