Það virðist fátt geta stoppað lið Lyngby með Hallgrím Jónasson innanborðs, en liðið hefur ekki enn tapað síðan Hallgrímur byrjaði að spila með liðinu. Þetta breyttist ekki í dag þegar SønderjyskE kom í heimsókn.

Hallgrímur gekk til liðs við nýliðana í Lyngby í sumar, en hann missti af byrjun tímabilsins vegna meiðsla og það er ekki langt síðan hann fór af stað aftur.

Lyngby vann SønderjyskE með tveimur mörkum gegn engu í dag, en liðið hefur unnið fimm leiki af sex síðan Hallgrímur hóf að spila; þessi eini leikur sem vannst ekki endaði með jafntefli gegn Esbjerg.

Lyngby er eftir sigurinn í dag í öðru sæti deildarinnar með 24 stig, fimm stigum á eftir toppliði FCK. Mótið er tæplega hálfnað í Danmörku, en Lyngby er búið að leika 14 leiki.