Eden Hazard skoraði eitt mark í stórsigri Chelsea í kvöld þegar liðið lagði Qarabag með fjórum mörkum gegn engu.
Þessi belgíski kantmaður skoraði þar með sitt 78.mark fyrir Chelsea og er því kominn með jafnmörg mörk og Eiður Smári Guðjohnsen skoraði á sínum ferli með Chelsea.
Það tók Hazard 264 leiki að skora þessi mörk en Eiður Smári lék 263 leiki á ferli sínum hjá Chelsea áður en hann gekk til liðs við Barcelona árið 2006.
Þeir félagar deila nú 16.sæti yfir markahæstu leikmenn í sögu Chelsea en á toppnum trónir Frank Lampard með 211 mörk.
Hazard hefur leikið fyrir Chelsea síðan hann gekk í raðir Lundúnarliðsins árið 2012. Þar áður sló hann í gegn með Lille í franska boltanum en Hazard er 26 ára gamall.
Athugasemdir