Þrír leikir fara fram í íslenska boltanum í dag. Allir leikirnir eru í kvennadeildunum. Tveir leikir fara fram í Pepsi deild kvenna og einn í 1.deild kvenna.

Í Pepsi deild kvenna eru það Blikarstúlkur sem taka á móti botnliði Hauka á Kópavogsvelli. Blikar geta endurheimt annað sæti deildarinnar með sigri en Haukar eru enn að eltast við að ná fyrsta sigri sínum í sumar.

Í hinum leik dagsins í Pepsi deild kvenna mætast Valur og Fylkir á Valsvellinum. Valur situr í fimmta sæti deildarinnar og getur komist upp fyrir Stjörnuna sem er í fjórða sætinu með sigri. Fylkir er hins vegar í bullandi fallbaráttu og þarf nauðsynlega á sigri að halda en þær eru 7 stigum frá öruggu sæti í deildinni.

Í 1.deild kvenna mætast Keflavík og Selfoss á Nettóvellinum í Keflavík. Selfoss er á toppi deildarinnar en Keflavík er í fjórða sætinu og með sigri getur Keflavík hleypt toppbaráttu deildarinnar í algjört uppnám.

Við hvetjum fólk til að fjölmenna á völlinn!