“Við gáfum þeim tvö mörk í leiknum í dag, ansi ódýr, á silfurfati. Mér fannst við bara ekki skapa okkur nógu mikið á síðasta þriðjungi til að vinna þennan leik því miður. En FH liðið spilaði vel í dag og því miður náðum við ekki að koma í veg fyrir þessi mörk sem við fengum á okkur og náðum ekki að skapa okkur nóg. Það er það sem klikkaði,” sagði Úlfur Blandon, þjálfari Vals, eftir 2-0 tap gegn FH í dag.
Lestu um leikinn: FH 2 - 0 Valur
Valsliðið hefur verið á góðri siglingu eftir EM pásuna fyrr í sumar og hafa þær skorað 18 mörk í þeim 5 leikjum sem þær hafa spilað eftir pásuna. En þær virtust ekki finna neinar glufur á vörn FH í dag.
“Nei við auðvitað spiluðum bara ekki nógu vel í dag. Það er bara hluti af þessu. Þú átt góða leiki og þú átt slæma leiki. Og í dag áttum við ekki nógu góðan leik. Við þurfum að rífa okkur í gang fyrir næsta leik. Það er það sem við þurfum að gera og ég veit það að við höfum mikla trú á því að við komum til baka í síðasta leiknum á tímabilinu og gerum það sem þarf að gera.”
Með sigri í dag eygðu Valsstúlkur von um að ná 2. sæti deildarinnar en það er nú ljóst að það er runnið þeim úr greipum eftir tapið fyrir FH. Það hlýtur að vera svekkjandi niðurstaða.
“Mig langaði alltaf í 1. sæti sko. Ég var aldrei að reyna að ná í þetta 2. sæti en auðvitað hefði verið skemmtilegra að enda ofar heldur en 3. sæti eða 4. sæti. En við ætlum að vinna síðasta leikinn. Það er númer eitt, tvö og þrjú,” sagði Úlfur að lokum.
Viðtalið við Úlf má sjá í spilaranum hér fyrir ofan.
Athugasemdir