Leikmenn Börsunga fögnuðu sigurmarkinu ákaft og gerðu það nálægt hörðustu stuðningsmönnum Valencia sem brugðust við með því að kasta öllu mögulegu inn á völlinn.

Neymar og Luis Suarez fengu báðir hluti í hausinn í fagnaðarlátunum og féllu til jarðar. Flaskan sem Neymar fékk í hausinn sést afar vel á upptökum.

„Ég er ekki hérna til að meta hvað sé hægt að gera til að bæta öryggisráðstafanir og koma í veg fyrir að áhorfendur kasti aðskotahlutum inn á völlinn," sagði Luis Enrique, þjálfari Barca, eftir leikinn.

„Leikmennirnir fögnuðu sigurmarki eins og allir myndu gera eftir svona erfiðan leik gegn mjög góðum andstæðingum."