Miklar vangaveltur hafa verið um framtíð Koeman og talað um að hann gæti misst starfið eftir 5-2 ósigurinn gegn Arsenal í gær.

Hollendingurinn stýrði æfingu Everton í morgun eins og ekkert hefði í skorist. Þá birta ensku götublöðin myndir af Koeman í góðum gír með vinum sínum í gærkvöldi. Þar virðist pressan ekki vera farin að segja til sín.

Everton hefur aðeins unnið tvo af níu leikjum sínum í ensku úrvalsdeildinni á þessu tímabili og er í 18. sæti. Koeman hefur sagt að hann trúi því að hann geti snúið gengi liðsins við.

Koeman fékk stuðningsyfirlýsingu frá Farhad Moshiri, eiganda Everton, eftir tap gegn Burnley á dögunum en síðan hefur liðið gert jafntefli við Brighton og tapað gegn Lyon og Arsenal.

Koeman tók við Everton í fyrrasumar og stýrði liðinu í sjöunda sæti ensku úrvalsdeildarinnar á fyrsta tímabili. Liðið komst í Evrópudeildina en þar hefur liðið einnig farið illa af stað á þessu tímabili og á litla möguleika á að komast upp úr riðli sínum.