„Við fengum kvöldið til þess að fagna sigrinum og svo daginn eftir fórum við að fókusa á þennan leik. Það eru margir leikir í þessari undankeppni og það þarf fókus í hvern leik. Þó maður vinni einn þarf að einbeita sér að næsta,“ sagði Gunnhildur Yrsa. Venjan er að tveir leikmenn úr hvoru liði séu sendir í lyfjapróf strax eftir landsleiki og það féll í hlut Gunnhildar og Sifjar í þetta skiptið. Var ekkert svekkjandi að þurfa að fara beint í það í stað þess að fagna með liðinu í klefanum?

„Það var ekki gaman í lyfjaprófinu þar sem að það tók smá tíma,“ svaraði Gunnhildur létt en bætti við að hún hefði verið í góðum félagsskap með Sif og liðslækninum. „Við vorum á undan þeim þýsku og það var mjög fínt að sitja í klefanum með þeim. Við vorum mjög hamingjusamar og þær voru það ekki,“ sagði Gunnhildur og glotti.

Fyrir þennan útileikjatvíhöfða notuðu leikmennirnir sem spila á Íslandi ýmsar aðferðir við að halda sér í formi enda íslenska deildin komin í frí. Þær Ingibjörg Sigurðardóttir og Sigríður Lára Garðarsdóttir nýttu fríið meðal annars í að æfa með Gunnhildi hjá Valerenga. Við spurðum Gunnhildi út í það.

„Ég sagði við Freysa að það væri alveg í boði að fá leikmenn í heimsókn. Það var fínt fyrir mig að fá íslendinga. Þetta eru frábærar aðstæður og ég vildi bara að þær fengju tækifæri til að sjá hvað er þarna úti. Vonandi hvetur það þær til að halda áfram,“ sagði Gunnhildur og bætti við að landsliðskonurnar ungu hefðu staðið sig mjög vel.

Hér að ofan er hægt að horfa á viðtalið í heild sinni.