„Ég hef ekki séð mikið og við eigum eftir að fara á æfingu. En hótelið er fínt og maturinn góður þannig að ég bið ekki um meira í bili,“ sagði landsliðskonan Hallbera Guðný Gísladóttir aðspurð um aðstæður í Znojmo. Hallbera er þangað mætt ásamt liðsfélögum sínum í íslenska landsliðinu og undirbýr sig fyrir mikilvægan leik gegn Tékklandi í undankeppni HM sem spilaður verður á morgun.
Ísland vann einn sinn allra stærsta sigur í fótbolta á föstudag þegar stelpurnar okkar lögðu Þjóðverja 3-2. Frammistaðan allra leikmanna var frábær og leikurinn meistaralega uppsettur af þjálfarateyminu. Er ekki erfitt að fylgja slíkum leik eftir með jafn góðri frammistöðu?
„Ég vill meina að við eigum að vera komnar á þann stað að við eigum að geta það. Við vitum að við þurfum að hafa mjög mikið fyrir þessum leik. Þær eru búnar að sýna það með árangri í Meistaradeildinni og í þessum leik á móti Þjóðverjum að þær eru með hörkulið. Ef við höldum að þetta verði auðveldur leikur endar það illa,“ svaraði Hallbera.
Upp kom skondið atvik á æfingu Íslands í Wiesbaden um daginn þegar Hallbera og fleiri landsliðskonur ákváðu að leika sér aðeins í handbolta fyrir upphitun. Taktarnir hjá Hallberu þóttu ekki viðunandi og aðstoðarþjálfarinn skaut létt á hana. Í kjölfarið óskaði Hallbera eftir aðstoð á Twitter við að læra að grípa. Við spurðum hana að lokum út í það mál.
Handboltataktar hjá stelpunum okkar
„Það var eitthvað verið að reyna að koma mér í samband við einhverja handboltamenn þarna en ég held ég vinni bara í þessu sjálf. Þetta var skammarlegt.“
„Það var náttúrulega enginn handbolti uppá Skaga þannig að hendurnar urðu dálítið eftir hjá mér,“ sagði landsliðskonan létt að lokum en hægt er að horfa á allt viðtalið við hana í spilaranum hér að ofan.
Athugasemdir