„Við fengum frí frá líkamlegri æfingu en maður er með hausinn skarpan og við tókum góðan fund í hádeginu í dag (í gær). Það var svona dagurinn,“ sagði Sif Atladóttir í samtali við Fótbolta.net á hóteli íslenska landsliðsins í Znojmo í gær. Íslenska liðið fékk frí frá fótboltaæfingu í gær en fundaði um Tékkaleikinn sem verður spilaður á morgun.
Að sögn Sifjar eru íslensku leikmennirnir komnar niður á jörðina eftir sigurinn stóra gegn Þýskalandi.
„Við vitum hvaða verkefni bíður og þetta var bara eitt skref í áttina að því sem við viljum gera.“
Það mæddi mikið á Sif í þeim leik og hún tók fjölmörg af sínum einkennis innköstum. Við spurðum Sif hvort hún hefði tölu á þeim og hvað hún hefði unnið mikinn tíma fyrir íslenska liðið með því að gefa sér tíma í köstin.
„Ég er búin að horfa á leikinn og þau voru ansi mörg. Ég er með góðar harðsperrur í maganum. Það segir mér ýmislegt. Það er ekki auðveld að fá svona miklar harðsperrur í magann. Það væri gaman að sjá statistíkina. Freysi sagði að ég náði allaveg nokkrum sekúndum í fyrri hálfleik“, sagði Sif brosandi.
Hvað varðar Tékkaleikinn á morgun þá er langt síðan að þjóðirnar mættust síðast. Það var fyrir tíð Sifjar í landsliðinu, fyrir 11 og 12 árum síðan.
„Dagný var að segja mér að við höfum spilað tvisvar við Tékkana. Það var í undankeppni HM 2005 og 2006. Áður en að ég kem inn. Þær eru sterkar og við höfum séð smá klippur frá þeim. Þær eru kvikar og þetta verður mjög töff leikur,“ sagði Sif að lokum.
Hægt er að horfa á viðtalið í heild sinni í spilaranum hér að ofan.
Athugasemdir