„Mér fannst þetta frekar ósanngjarnt, við vorum inni í leiknum allan leikinn og mér fannst þeir heppnir með þessi mörk," sagði Björn Bergmann Sigurðarson framherji Íslands eftir 3-0 tap gegn Mexíkó í Santa Clara í kvöld en eftir að hafa komist í 2-0 bætti Mexíkó við þriðja markinu í lokin, eitthvað sem leit út fyrir að eiga að vera fyrirgjöf.
Lestu um leikinn: Mexíkó 3 - 0 Ísland
„Ég veit ekki hvort hann var að reyna þetta þriðja eða ekki. Þetta var svolítið leiðinlegt en við vorum solid allan leikinn og áttum tækifæri á að skora og áttum að skora allavega eitt eða tvö mörk."
Þetta er fyrri leikur Íslands í æfingaferðinni í Bandaríkjunum en liðið mætir Perú í New Jersy á þriðjudaginn. Björn er ánægður með verkefnið.
„Þetta er bara til að fá okkur saman og venjast hvorum öðrum. Það er gott fyrir allan hópinn að fá svona gott lið í æfingaleik," sagði hann en við spurðum hann í lokin hvort hann hafi verið sáttur með eigin frammistöðu.
„Já, mér fannst ég standa mig ágætlega. Vann flesta skallabolta og náði að gera það sem ég vildi gera. Mann langar alltaf að komast í færi og ná að skora en ég barðist allavega nóg fannst mér."
Athugasemdir