„Mér fannst úrslitin ekki gefa rétta mynd af þessum leik," sagði Sverrir Ingi Ingason eftir 3-0 tapið gegn Mexíkó í nótt.
Lestu um leikinn: Mexíkó 3 - 0 Ísland
„Þeir fá í raun bara eitt færi í leiknum þegar þeir skora annað markið. Svo skora þeir úr aukaspyrnu í fyrri hálfleiknum og ég held að það sé heppnisstimpill yfir þessu þriðja marki. Hann ætlar að senda boltann fyrir og hann enndar í netinu," bætti hann við.
„Í þokkabót fengum við fullt af færum til að skora en þetta datt með þeim en ekki okkur í dag. Mér fannst fyrri hálfleikurinn mjög góður, þeir ná aldrei að opna okkur og við fáum tvö dauðafæri til að skora. Markmaðurinn þeirra gerir mjög vel í bæði skiptin. Við hefðum getað verið yfir í hálfleik en svo reynum við að færa liðið framar á völlinn í seinni hálfleik og fáum á okkur mark í andlitið og þá var lítið eftir. Við gáfum okkur alla í þetta og spiluðum við gott lið. Við getum tekið helling jákvætt út úr þessum leik."
Sverrir Ingi spilaði fyrri hálfleik í miðverði og seinni á miðjunni.
„Ég er fyrst og fremst hafsent og hef spilað meira og minna þar allan minn feril. Heimir vildi prófa mig þar og ég geri bara það sem þjálfarinn vill. Ég reyndi að leggja eins vel fram og ég gat. Það eru aðeins meiri hlaup en í hafsentinum en það er gaman að prófa eitthvað nýtt og við verðum að geta leyst fleiri en eina stöðu ef þess kemur."
Athugasemdir