Úrslitaleikur B deildar Lengjubikars karla fór fram í Boganum á Akureyri í dag. Magni frá Grenivík og Grótta áttust við í ansi fjörugum leik.

Magnamenn komust snemma yfir með marki Lars Óla Jessen en Gróttumenn svöruðu með tveimur mörkum frá Jóhanni Hilmarssyni og Viktori Segatta. Markahrókurinn Kristinn Þór Rósbergsson jafnaði svo leikinn áður en flautað var til hálfleiks.

Gróttumenn komu grimmir inn í seinnihálfleik og Brynjar Steinþórsson kom þeim í forustuna áður en Viktro skoraði annað mark sitt í leiknum.

Héldu þá margir að leik væri lokið í Boganum en Magnamenn gáfust ekki upp. Reynsluboltinn Orri Hjaltalín tók þá til sinna ráða og skoraði tvö mörk á síðustu 5 mínútum leiksins.

Grípa þurfti til vítaspyrnukeppni til að útkljá leikinn og þar voru það Gróttu menn sem fóru með sigurinn í hreint ótrúlegum leik.