Íslendingaliðið AGF rúllaði yfir Álaborg 4-0 í dönsku úrvalsdeildinni í dag. Þetta var nauðsynlegur sigur fyrir AGF sem er sem stendur í umspilssæti um fall.
Björn Daníel Sverrisson og Theodór Elmar Bjarnason voru báðir í byrjunarliði AGF og voru báðir teknir af velli á 82. mínútu í stöðunni 3-0.
Í Noregi gerði Molde markalaust jafntefli gegn Haugesund. Molde hefur á síðustu árum átt í miklu basli með að sækja þrjú stig til Haugesund og það varð ekki breyting á því í dag.
Björn Bergmann Sigurðarson lék allan leikinn í sókn Molde og fékk besta færi fyrri hálfleiksins. Óttar Magnús Karlsson lék síðustu 26 mínúturnar fyrir Molde.
Molde situr í 5. sæti norsku deildarinnar með 10 stig, þremur stigum á eftir toppliði Rosenborg.
Athugasemdir