Spá Fótbolta.net - 1. sæti: Valur

Spáin:
1. Valur 84 stig
2. FH 73 stig
3. Stjarnan 67 stig
4. KA 60 stig
5. KR 58 stig
6. Breiðablik 55 stig
7. Grindavík 43 stig
8. Fjölnir 23 stig
9. ÍBV 21 stig
10. Fylkir 19 stig
11. Víkingur R. 18 stig
12. Keflavík 15 stig

Um liðið: Eftir tvo bikarmeistaratitla í röð var komið að Valsmönnum að taka Íslandsmeistaratitilinn í fyrra. Liðið var langbest í deildinni og skemmtanagildið var að auki gríðarlega hátt. Verulega verðskuldaður titill og félagið ætlar ekki að líta til baka, það hefur styrkt sig enn frekar fyrir tímabilið og á sér draum um velgengni í Evrópukeppni.

Þjálfari - Ólafur Jóhannesson Eftir þrjú tímabil hjá Val: Íslandsmeistari, bikarmeistari tvisvar, deildabikarmeistari, meistari meistaranna þrisvar, deildabikarmeistari og Reykjavíkurmeistari tvisvar. Geggjaður árangur Valsliðsins eftir að Ólafur var ráðinn. Hann hefur komið með stöðugleika innan félagsins og óhætt að segja að hann hafi verið réttur maður á réttum tíma. Neistinn fer svo sannarlega ekki þverrandi hjá Óla sem sagði frá því í þættinum Návígi að hann væri alls ekki farinn að hugsa út í það að segja þetta gott í boltanum.

Fullkomin lína milli skemmtunar og fagmennsku

Styrkleikar: Hvar á maður að byrja? Hrikalega öflugur hópur og geta flottir fótboltamenn þurft að sætta sig við að komast ekki í hóp. Vopnin í sóknarleiknum eru mýmörg og liðið er jafnvígt á fleira en eitt leikkerfi. Þjálfarateymið fer í upptalningu yfir styrkleika en Óli og Bjössi hafa fundið hina fullkomnu línu milli skemmtunar og fagmennsku. Leikmannahópurinn er skipaður öflugum en um leið metnaðarfullum leikmönnum sem vilja hafa atvinnumannabrag í kringum sig. Meðal nýrra leikmanna í hópnum er hægri bakvörðurinn Birkir Már Sævarsson sem á fast sæti í byrjunarliði íslenska landsliðsins.

Veikleikar: Sókn er besta vörnin hjá Val. Liðið er gríðarlega skemmtilegt áhorfs og eðlilega getur liðið fengið færi frá andstæðingum í andlitið þegar áherslan er svona mikil á sóknarleikinn. Ákveðinn fórnarkostnaður. Þó breiddin sé mikil er liðið aðeins með tvo eiginlega miðverði, það er samt erfitt að tala um það sem veikleika þar sem margir í hópnum geta leyst þá stöðu ef á þarf að halda.

Lykilmenn: Birkir Már Sævarsson og Haukur Páll Sigurðsson. Birkir er að búa sig undir að mæta Lionel Messi á HM þann 16. júní og augu allra munu beinast að honum í deildinni. Hleypur eins og vindurinn og er traustur sem klettur. Haukur Páll er límið í liðinu, hjartað á miðjunni.

Gaman að fylgjast með: Kristinn Freyr Sigurðsson er kominn aftur heim eftir eins árs dvöl hjá Sundsvall. Kristinn var besti leikmaður Íslandsmótsins 2016, er með gríðarleg fótboltagæði og gaman að sjá hvernig hann lætur til sín taka á tímabilinu. Guðjón Pétur Lýðsson var í liði ársins í fyrra en hann spilar sömu stöðu og Kristinn. Gott dæmi um ótrúlega breidd Valsliðsins.

Spurningamerkið: Nær Valur að gera eitthvað í Evrópu? Sá draumur að íslenskt lið komist í riðlakeppni í Evrópu er svo sannarlega til staðar. Geta Valsmenn orðið þeir fyrstu til að afreka það? Það er allavega greinilegt að Evrópukeppnin var meðal þess sem var í huga Valsmanna þegar kom að því að styrkja hópinn í vetur. Liðið vill berjast á öllum vígstöðvum.

Völlurinn: Maður getur nánast bókað hágæða skemmtun með því að mæta á Valsvöllinn. Þar líður Valsmönnum best og bjóða upp á mikla fótboltaskemmtun á gervigrasi sínu. Aðstaða félagsins er orðin frábær og umgjörðin fyrir áhorfendur verður bara betri. Nú er búið að gera upp „Fjósið", lítið hús við hlið vallarins, og það er orðið að frábærum vettvangi fyrir stuðningsmenn til að væta kverkarnar og fara yfir málin.

„Það þarf að spila mótið - Við höfum ekki unnið eitt né neitt"

Aðstoðarþjálfarinn segir - Sigurbjörn Hreiðarsson
„Það er bara eðlilegt að verið sé að spá okkur efsta sætinu. Við urðum meistarar í fyrra. Það er yfirleitt þannig að ríkjandi meisturum sé spáð fyrsta sæti. Við höfum verið fínir í vetur og hópurinn er góður. Við kippum okkur ekki upp við þessa spá, það er bara gaman að henni, en það þarf að spila mótið. Núna eru öll lið með núll stig og við höfum ekki unnið eitt né neitt."

Komnir:
Birkir Már Sævarsson frá Hammarby
Kristinn Freyr Sigurðsson frá GIF Sundsvall
Ívar Örn Jónsson frá Víkingi R.
Ólafur Karl Finsen frá Stjörnunni
Sveinn Sigurður Jóhannesson frá Stjörnunni
Tobias Thomsen frá KR
Valur Reykjalín Þrastarson frá KF

Farnir:
Haukur Ásberg Hilmarsson
Orri Sigurður Ómarsson í Sarpsborg
Nicolas Bogild
Sindri Scheving í Víking R.

Sjá einnig:
Eiður Aron og Birkir Már mættu í viðtal
Hin hliðin - Anton Ari Einarsson (Valur)

Leikmenn Vals sumarið 2018:
1 Anton Ari Eiríksson
2 Birkir Már Sævarsson
3 Ívar Örn Jónsson
4 Einar Karl Ingvarsson
5 Sindri Björnsson
7 Haukur Páll Sigurðsson
8 Kristinn Ingi Halldórsson
9 Patrick Petersen
10 Guðjón Pétur Lýðssson
12 Sigurður Egill Lárusson
13 Rasmus Christiansen
14 Arnar Sveinn Geirsson
16 Dion Acoff
17 Andri Adolphsson
19 Tobias Thomsen
21 Bjarni Ólafur Eiríksson
23 Andri Fannar Stefánsson
25 Sveinn Sigurður Jóhannesson
32 Eiður Aron Sigurbjörnsson
71 Ólafur Karl Finsen
77 Kristinn Freyr Sigurðsson

Leikir Vals 2018:
27.apríl Valur – KR
7.maí Víkingur R. – Valur
13.maí Valur – Fylkir
18.maí Valur – Stjarnan
22.maí Grindavík – Valur
27.maí Valur – Breiðablik
4.júní Fjölnir – Valur
9.júní Valur – KA
13.júní ÍBV – Valur
20.júní Valur FH
1.júlí Keflavík – Valur
5.júlí KR – Valur
21.júlí Valur – Víkingur R
29.júlí Fylkir – Valur
8.ágúst Stjarnan – Valur
13.ágúst Valur – Grindavík
20.ágúst Breiðablik – Valur
25.ágúst Valur – Fjölnir
2.september KA – Valur
16.september Valur – ÍBV
23.septemer FH – Valur
29.september Valur – Keflavík

Spámennirnir: Arnar Daði Arnarsson, Elvar Geir Magnússon, Guðmundur Aðalsteinn Ásgeirsson, Hafliði Breiðfjörð, Magnús Már Einarsson, Magnús Þór Jónsson og Tryggvi Guðmundsson.