Spænski miðvallarsnillingurinn Xavi Hernandez lék sinn síðasta deildarleik fyrir Barcelona á Nou Camp í gær þegar Barcelona tók á móti Deportivo La Coruna.
Xavi var kvaddur með virktum enda fer þarna einn besti leikmaður í sögu félagsins.
Barcelona á þó einn leik eftir á tímabilinu á Nou Camp en liðið mætir Athletic Bilbao í bikarúrslitum þann 30.maí næstkomandi. Engu að síður var Xavi formlega kvaddur í leiknum í gær.
Hann átti erfitt með að halda aftur af tilfinningum sínum þegar tæplega 100 þúsund manns hylltu kappann að leik loknum.
Xavi var 11 ára gamall þegar hann gekk í raðir Barcelona og hefur leikið með liðinu alla tíð síðan. Á undanförnum árum hefur hann verið lykilmaður í gríðarlega sigursælu liði en hann hefur unnið 8 deildartitla og 3 meistaradeildartitla. Hann gæti bætt þeim fjórða við þann 6.júní næstkomandi.
Þá hefur Xavi verið potturinn og pannan í sigursælu liði Spánverja en hann var í liði Spánverja sem vann HM 2010 og EM 2008 og 2012
Hann hefur leikið yfir 800 leiki fyrir Barcelona og er leikjahæsti leikmaðurinn í sögu félagsins en hann mun halda til Katar í sumar þar sem hann hefur gert þriggja ára samning við Al-Sadd.
Myndband af magnaðri kveðjustund Xavi má sjá hér fyrir neðan.
Athugasemdir