„Það er gaman að vera kominn heim. Mér sýnist ég hafa komið með góða veðrið með mér, það hefur víst verið ömurlegt veður hér. Ég og konan sögðum það í gær að við ætluðum að koma með góða veðrið heim og það virðist hafa heppnast," sagði landsliðsmaðurinn Emil Hallfreðsson sem er kominn heim eftir langt og strangt tímabil á Ítalíu með Udinese þar sem margt gekk á, bæði innan og utan vallar.
„Þetta var lærdómsríkt. Maður er alltaf að læra eitthvað nýtt. Þetta var þannig séð ekki skemmtilegasta tímabilið, ég fékk ekki að spila eins mikið og ég vildi. Það var gott að enda þetta vel, ég spilaði síðustu leikina sem skiptu ótrúlega miklu máli og fékk traustið frá nýja þjálfaranum, sem var sá þriðji á þessa tímabili," sagði Emil sem býst við því að vera áfram hjá Udinese en hann á enn tvö ár eftir af samningi sínum.
Ítalir komust ekki á HM eftir að hafa dottið út í umspili gegn Svíþjóð.
„Það er fyndið að segja frá því en La Gazzetta dello Sport hafði samband við mig um daginn og þeir eru með eitthvað plot í gangi; "Ítalir ætla að styðja Íslendinga á HM" - og þeir ætla skrifa einhverjar átta síður á hverjum degi um íslenska landsliðið. Það virðist vera íslensk HM stemning á Ítalíu þessa dagana. Það er pínu fyndið," sagði Emil glottinn að lokum.
Viðtalið í heild sinni má sjá í sjónvarpinu hér að ofan.
Athugasemdir