Aron Sigurðarson hóf leik á bekknum hjá Tromsö í dag þegar liðið fékk Stabæk í heimsókn. Gestirnir voru 2-0 yfir þegar Aron kom inn af bekknum á 70.mínútu. Óhætt er að segja að innkoma Arons hafi fært sóknarleik Tromsö nýtt líf því leiknum lauk með 2-2 jafntefli.

Á sama tíma lék Björn Daníel Sverrisson allan leikinn fyrir Viking þegar liðið gerði 2-2 jafntefli við Odds en Patrick Pedersen, fyrrum framherji Vals, skoraði jöfnunarmark Viking í uppbótartíma.

Þá var einn Íslendingaslagur í norska boltanum í dag þegar Guðmundur Kristjánsson og félagar í Start fengu Elías Má Ómarsson og félaga í Valerenga í heimsókn. Guðmundur lék allan leikinn en Elías Már sat allan tímann á bekknum í 4-2 sigri Valerenga.