"Mér fannst þetta allt of stórt tap. Í fyrri hálfleik fáum við á okkur þrjú mörk en það var ekkert annað í gangi hjá þeim. Valsliðið er feikilega gott en mér fannst við gefa þeim of ódýr mörk í fyrri hálfleik," sagði Orri Þórðarson, þjálfari FH, eftir 4-0 tap gegn Val í Pepsídeild kvenna í kvöld.
Lestu um leikinn: FH 0 - 4 Valur
"Í stöðunni 1-0 áttum við 15-20 mínútur sem voru virkilega fínar og mér fannst við vera ofan á. Svo fengum við á okkur tvö mörk undir lok fyrri hálfleiks."
"Mér fannst seinni hálfleikurinn fínn að mörgu leyti, við fengum sénsa og vorum að setja á þær pressu en við náðum ekki að skora."
FH liðið átti fín færi en náði ekki að gera sér mat úr þeim. "Það vantar þessar úrslitasendingar þegar við erum komnar fram. Það vantar ekki mikið upp á en ég er sammála því að við vorum að fá vænlegar stöður sem við áttum að nýta betur."
FH var að spila ágætlega eftir fyrsta mark Vals og því mikið áfall að fá á sig tvö mörk undir lok fyrri hálfleiks og því 3-0 undir í hálfleik.
"Það er elsti frasinn í bransanum að mörk breyta leikjum og annað mark Vals var eins og blaut tuska í andlitið. Stelpurnar sýndu samt að þær hætta aldrei og reyndu að setja mark."
FH náði að skora eitt mark í fyrri hálfleik en markið var dæmt af.
"Ég var ekki í neinni aðstöðu til að sjá þetta. Hann flaggaði rangstöðu og ég verð að sjá þetta betur í sjónvarpinu,"
Blaðamanni sýndist dómarinn flagga brot í umræddu marki FH en Orri var ekki sammála því. "Ég get ekki ímyndað mér að hann hafi flaggað brot því mér fannst minn leikmaður fara í boltann þegar þær skullu saman. Markmenn eiga ekki að vera heilagar kýr inn í vítateig."
Athugasemdir