„Við byrjuðum af krafti en svo gáfum við allt of mikið eftir og þær nýttu sér það og skoruðu eiginlega verðskuldað mark í lokin," sagði Sóley Guðmundsdóttir, fyrirliði ÍBV, eftir tap á útivelli gegn toppliði Stjörnunnar.
Lestu um leikinn: Stjarnan 2 - 1 ÍBV
ÍBV náði forystu í leiknum með einstaklingsframtaki hjá Cloe Lacasse sem hljóp með boltann frá eigin vallarhelmingi áður en hún skoraði framhjá Berglindi í Stjörnumarkinu.
„Cloe sprengdi náttúrulega upp vörnina. Þetta er það sem hún gerir best og við áttum alveg skilið að komast yfir. Það hefði verið gott að halda þessu en svo fór sem fór og það er lítið hægt að segja við þessu."
Það dró af Eyjaliðinu eftir því sem leið á leikinn en Sóley vildi ekki afsaka liðið sitt með þreytu.
„Það ætti ekki að vera en við höfum verið ferskari. Við eigum ekkert að vera þreyttar. Það er vika síðan að síðasti leikur var og maður á að ná sér eftir það."
Þrátt fyrir tap ÍBV í kvöld hefur liðið verið á fínu skriði og Sóley segir markmiðið vera að ná 3. sætinu en til þess þarf liðið nú að vinna upp 6 stiga forskot Vals.
„Þetta lítur bara ágætlega út og við eigum alveg að geta endað í 3.sæti jafnvel þannig að við bara stefnum eins hátt og hægt er."
Athugasemdir
