Víkingur hafði betur gegn Þrótti, 1-0, þegar liðin mættust í B-riðli Reykjavíkurmótsins rétt í þessu.

Staðan var enn 0-0 þegar flautað var til leikhlés í Egilshöllinni, en í þeim síðari dró til tíðinda.

Þróttarar voru virkilega ósáttir með að fá ekki vítaspyrnu í seinni hálfleiknum og voru í raun enn að mótmæla þegar Víkingar geystust upp í sókn. Þar skoraði Stefán Þór Pálsson mark sem reyndist vera sigurmark leiksins.

Þróttarar fengu að vísu nóg af tækifærum til að jafna og hittu tvisvar í stöngina. Seinna stangarskotið var hörkuskalli eftir góða fyrirgjöf rétt fyrir leikslok.

Fleiri urðu mörkin hins vegar ekki og 1-0 sigur Víkings staðreynd. Bæði lið voru með eitt stig eftir fyrstu tvo leiki sína en Víkingur fór upp í 3. sætið með sigrinum.