Undankeppni HM 2018 heldur áfram í dag með níu leikjum í þremur riðlum. Riðlarnir sem um ræðir eru A-, B- og H-riðlar.

Í A-riðlinum eru Frakkland og Holland á meðal þjóða. Hollendingar heimsækja Búlgaríu á meðan Frakkland leikur við Lúxemborg, en fyrr um daginn mæta frændur okkar Svíar liði Hvíta Rússlands í þessum sama riðli. Frakkar eru efstir í þessum riðli fyrir leiki dagsins.

Alls eru sex leikir í beinni útsendingu í dag, en allir þrír leikirnir í B-riðli eru sýndir. Sviss mætir Lettlandi, og Færeyjar fara í heimsókn til Andorra áður Portúgal og Ungverjaland eigast við. Þessi tvö síðastnefndu lið voru með okkur Íslendingum í riðli á EM í sumar.

Að lokum er það svo H-riðillinn. Þar mætast tvö efstu liðin, Belgía og Grikkland, kl. 19:45, en fyrr um daginn eru tveir aðrir leikir. Kýpur og Eistland mætast annars vegar og Bosnía og Gíbraltar hins vegar.