„Mér fannst þetta bara mjög skemmtilegur leikur. Þær voru mjög ferskar og góðar þannig að það var fínt að setja nokkur mörk á þær samt sem áður,“ sagði Elín Metta Jensen en hún átti góðan leik í liði Vals sem vann 5-1 sigur á Grindavík. Valskonur hafa nú unnið tvo leiki í röð eftir strembna byrjun.
Lestu um leikinn: Valur 5 - 1 Grindavík
„Við reynum bara að halda í skemmtilegheitin og fjörið og ég held að það hafi alveg tekist í dag. Við tökum bara einn leik í einu núna og reynum að hafa gaman og njóta.“
Valsliðið hefur verið að spila nýja taktík í sigurleikjunum tveimur og Elín Metta segir það ganga vel þó enn sé verið að slípa leik liðsins.
„Mér finnst það bara ganga vel hjá okkur og við erum að venjast nýju kerfi. Mér finnst það bara ganga nokkuð vel og við erum ennþá að slípa þetta.“
Valur bauð upp á veislu fram á við og skoraði fimm mörk í leiknum. Elín Metta nefnir mark númer tvö sem mikilvægt og fagnar því einnig að liðið sé að skora eftir föst leikatriði.
„Það var mjög flott þegar að Margrét Lára sótti mark númer tvö. Það var mikilvægt mark. Svo komu hin einhvern veginn í kjölfarið.“
„Við erum náttúrulega með mjög sterka skallamenn og það eru allir mjög gráðugir þegar þeir mæta inn í teig, sem er gott og við uppskárum í dag,“ sagði Elín Metta meðal annars en nánar er rætt við hana í sjónvarpinu hér að ofan.
Athugasemdir