Manchester City og Manchester United hafa snúið bökum saman og gefið eina milljón punda í neyðarsjóð sem settur var á laggirnar fyrir fórnarlömb hryðjuverkanna í Manchester borg á mánudag.

22 manns létust og 64 særðust í hryðjuverkaárásinni og voru börn á meðal þeirra látnu.

„Það er rétt að við gerðum þetta í sameiningu gegn þessum hræðilega atburði," sagði Ed Woodward, framkvæmdarstjóri Manchester United.

„Við höfum verið auðmjúk af styrk og samstöðu allra í Manchester," sagði Khaldroon Al Mubarak stjórnarformaður Manchester City.

Hryðjuverkaárásin var framin á mánudag eftir tónleika bandarísku söngkonunnar Ariana Grande.