Pólverjar urðu fyrsta liðið tryggja sér farseðilinn áfram í 8-liða úrslita á EM Frakklandi. Liðið hafði betur gegn Sviss í háspennuleik.

Pólland byrjaði betur og fékk dauðafæri í upphafi leiks, en ekki tókst að nýta það. Þegar stutt var í hálfleik kom svo fyrsta markið, það skoraði Jakub Błaszczykowski eftir góðan undirbúning frá Pavel Grosicki.

Staðan var 1-0 í hálfleik og stefndi lengi vel í sigur Pólverja, en Sviss náði þó að jafna þegar Xherdan Shaqiri skoraði rosalegt mark. Shaqiri klippti boltann á lofti stöngin inn og klárlega eitt af mörkum mótsins ef ekki það besta.

Það þurfti framlengja leikinn og þar var ekkert skorað. Sviss fékk hættulegasta færið, en Fabianski varði vel í markinu.

Í vítaspyrnukeppninni voru Pólverjar sterkari. Þeir skoruðu úr öllum sínum spyrnum á meðan Granit Xhaka reyndist skúrkurinn. Hann skaut sinni spyrnu langt fram hjá og sigur Pólverja staðreynd.

Pólland mun mæta annað hvort Króatíu eða Portúgal í 8-liða úrslitum, en Króatía og Portúgal eigast við í kvöld.