Það er nóg að gerast í íslenska boltanum í dag, en hann er að taka við sér eftir smá pásu.

Í dag eru aðalleikirnir í Pepsi-deild kvenna og Inkasso-deildinni. Einn leikur er í beinni á Stöð 2 Sport og nóg um að vera.

Einn leikur er klukkan 11:00, en dagurinn hefst fyrir alvöru klukkan 14:00 með heilum helling af leikjum. Þar á meðal í Pepsi-deild kvenna Fylkir fær Breiðablik í heimsókn og FH og Þór/KA mætast í Krikanum. Á sama tíma mætast svo Fjarðabyggð og Þór í Inkasso-deildinni, en Þór getur farið á toppinn með sigri.

Nágrannarnir í KA geta svo stolið toppsætinu aftur, vinni þeir HK á Akureyri, en bæði Þór og KA eru með 13 stig fyrir leiki dagsins.

Sjónvarpsleikurinn er svo leikur Stjörnunnar og Vals í Pepsi-deild kvenna. Hann hefst klukkan 16:00 og er í beinni, en bæði lið eru í toppbaráttu og er Stjarnan í toppsætinu þegar dagurinn hefst.

Einnig er leikið í 2. deild karla, 3. deild karla, 1. deild kvenna og 4. deild karla, en alla leikina má sjá hér að neðan.