Það gengur hvorki né rekur hjá West Ham í ensku úrvalsdeildinni en liðið tapaði sínum fimmta leik í dag þegar Southampton kom í heimsókn á Ólympíuleikvanginn í Lundúnum.

Charlie Austin hefur verið heitur að undanförnu og hann kom Southampton í 1-0 á 40.mínútu. Dýrlingarnir héldu áfram að sækja og voru miklu betri aðilinn í leiknum og það skilaði sér í öðru marki eftir klukkutíma leik þegar Dusan Tadic skoraði eftir sendingu frá Austin.

West Ham vildi fá vítaspyrnu stuttu síðar þegar boltinn fór greinilega í hönd Ryan Bertrand innan vítateigs en dómari leiksins sá ekkert athugavert við það.

Niðurlægingin var svo fullkomnuð fyrir heimamenn þegar James Ward-Prowse gulltryggði sigur gestanna með marki í uppbótartíma.

West Ham er því enn í fallsæti en Southampton heldur áfram á góðu skriði og er nú komið upp í níunda sæti deildarinnar.