Heil umferð verður spiluð í Pepsi-deildinni í dag og hefjast allir leikirnir á sama tíma eða kl 14:00.

FH er orðið Íslandsmeistari en næg spenna er um Evrópusæti og á botni deildarinnar.

Víkingur Ó. og KR mætast en liðin þurfa bæði á stigunum að halda af mismunandi ástæðum. Víkingar eru í mikilli botnbaráttu á meðan KR-ingar eru að berjast um Evrópusæti.

Fylkir og Þróttur mætast í leik upp á líf og dauða hjá Fylki sem verður að vinna lið eins og Þrótt, ætli þeir sér að halda sæti sínu í deildinni. ÍBV fær Val í heimsókn en Eyjamenn eru í mikilli baráttu við botninn.

Fjölnir og Stjarnan mætast í hrikalega mikilvægum leik en bæði lið eru í mikilli og spennandi Evrópubaráttu. ÍA fær Breiðablik í heimsókn á Skagann en Breiðablik er í baráttu um Evrópusætið mikilvæga.