Tottenham gefst ekki upp í baráttunni um enska meistaratitilinn. Tottenham er eftir leiki kvöldsins fjórum stigum á eftir toppliði Chelsea og það er vonandi spenna framundan.

Tottenham heimsótti Crystal Palace í Lundúnarslag í kvöld. Crystal Palace hefur verið að spila frábærlega upp á síðkastið og því um erfiðan leik fyrir Tottenham að ræða.

Það var frekar lítið um færi framan af, Tottenham sótti, en Palace-menn vörðust vel. Á 78. mínútu braut hinn danski Christian Eriksen ísinn fyrir Tottenham, en það reyndist eina mark leiksins.

Spurs tók stigin þrjú og þeir halda í við Chelsea, eru fjórum stigum á eftir þeim þegar þrír leikir eru eftir. Palace er um miðja deild.

Hér að neðan má sjá stigatöfluna í deildinni, en það gæti tekið hana einhvern tíma að uppfæra sig.