„Annars er bara fínt að fá þetta fram og sjá að í 16 af 22 bardögum sumarsins ættum við að vera metnir sem lakara og ólíklegra liðið. Það liggja ákveðin tækifæri þar," segir Kristján en hver eru markmið Hauka í sumar? „Miðið er stillt á mark andstæðinganna og ætlunin að koma boltanum þangað inn sem oftast."

Aðspurður hvort hann sé ánægður með hvernig gekk að styrkja liði í vetur svaraði Kristján léttur í bragði: „Mjög ánægður. Það taka nú orðið allir í hópnum yfir 100 í bekk svo ég gæti ekki verið sáttari."

Haukar fengu Ísak Atla Kristjánsson á láni frá Fjölni í vikunni og von er á frekari liðsstyrk á næstu dögum.. „Já, ég á nokkra menn inni sem koma á síðustu stundu frá Bandaríkjunum og Danmörku. Einn af þeim tekur 115 í bekk."

Björgvin Stefánsson var næstmarkahæstur í Inkasso-deildinni í fyrra með 14 mörk en hann fór frá Haukum til KR í sumar. Hvernig ætla Haukar að fylla skarð hans?

„Björgvin Stefáns? Hver er það aftur? Er það nokkuð gaurinn sem ég sagði að væri efnilegasti leikmaður Íslands í viðtali við ykkur fyrir rúmum áratug síðan?" sagði Kristján Ómar og sló á létta strengi. „Ég er með nokkra frábæra sóknarmenn og hefði því örugglega endað hvort eð er með að nota Bjögga á miðjunni. Þar var hann bestur í yngri flokkunum."

Inkasso-deildin hefst laugardaginn 5. maí og Kristján Ómar sér fram á að ÍA og Víkingur Ólafsvík verði efst eftir að hafa fallið úr Pepsi-deildinni í fyrra. „Mér sýnist talsverðar breytingar á milli ára átt sér stað hjá mörgum liðum og sum lið gætu orðið einhverjar umferðir að stilla sig af og finna sinn leik. Vesturlandsliðin verða sér á báti en að öðru leyti finnst mér frekar erfitt að segja um hverjir eiga eftir að raða sér í sætin á eftir þeim," sagði Kristján Ómar.