Sænska knattspyrnusambandið hefur staðfest að Zlatan Ibrahimovic, framherji LA Galaxy, verði ekki í hópnum sem fer á HM í sumar.
Hinn 36 ára gamli Zlatan hætti að spila með landsliði Svíþjóðar eftir EM 2016 en á dögunum gaf hann í skyn að hann yrði í hópnum á HM í sumar.
„Ég ræddi við Zlatan á þriðjudag. Hann tjáði mér að hann hafi ekki breytt afstöðu sinni gagnvart landsliðinu. Hann segir ennþá nei," sagði Lars Richt hjá sænska knattspyrnusambandinu í dag.
Zlatan verður því ekki í hópnum sem Janne Andersson landsliðsþjálfari velur þann 15. maí.
Hins vegar eru sögusagnir um að Zlatan mæti til Rússlands til að starfa sem sérfræðingur í sjónvarpi eða til að auglýsa fyrir styrktaraðila.
Svíþjóð er í riðli með Þýskalandi, Mexíkó og Suður-Kóreu á HM í sumar.
Athugasemdir