Fótbolti.net náði tali af Ásmundi Arnarssyni, þjálfara Fylkis, eftir skellinn gegn Þór. Ásmundur var að vonum gríðarlega svekktur með úrslit leiksins.
„Þetta eru gríðarleg vonbrigði í dag. Fyrri hálfleikur byrjaði kannski allt í lagi. Svo kom þarna kafli þar sem að við missum aðeins dampinn. Erum flatir og út úr stöðum. Þeir skora mark á okkur og sleppa í gegn. Rautt spjald og þrátt fyrir það erum við ekkert ólíklegri en þeir í fyrri hálfleiknum. Við sköpum okkur fjögur, fimm fín færi og það er grátlegt að ná ekki að skora á þá í þeirri stöðu.“
„Í seinni hálfleik ætlum við náttúrulega að reyna að koma til baka. Sýna þolinmæði og þétta raðirnar en það gerðist ekki. Menn voru út úr stöðum og eins og villuráfandi sauðir á köflum. Varnarleikurinn var heilt yfir barnalegur á köflum í seinni hálfleik og því fór sem fór.“
Eftir tapið sitja Fylkismenn í ellefta og næstneðsta sæti Pepsi-deildarinnar með 2 stig eftir fimm fyrstu umferðirnar.
„Við stimpluðum okkur inn í bullandi botnbaráttu með þessari niðurstöðu í dag og þar erum við og fyrir því þurfum við að berjast eins og staðan er. Það eru mörg stig í pottinum ennþá en þetta er eins og hlutirnir líta út núna og það er okkar að reyna að vinna úr því,“ sagði vonsvikinn Ásmundur að lokum en hægt er að horfa á allt viðtalið við hann í sjónvarpinu hér að ofan.
