„Þetta er æðislegt. Það er gaman að vinna fótboltaleiki. Þetta snýst um það og það tókst i dag,“ sagði Jóhann Þórhallsson, leikmaður Þórs, í samtali við Fótbolta.net eftir 4-1 sigurinn á Fylki.
Það var fjörugur leikkafli í fyrri hálfleik þar sem Þórsarar komust yfir og Fylkismenn misstu mann af velli með rautt spjald. Fylkismenn efldust aðeins við mótlætið fyrst um sinn en áttu svo fá svör við leik Þórsara í síðari hálfleik. Aðspurður um upplegg Þórsara fyrir síðari hálfleikinn svaraði Jóhann:
„Við ætluðum að teygja á þeim og lögðum náttúrulega fyrst og fremst upp með að gera það og keyra aðeins á þá. Það tókst. Við skoruðum mark snemma í seinni hálfleik og það er erfitt fyrir þá að koma til baka.“
Páll Viðar Gíslason kom mörgum á óvart og gerði tvær breytingar á liði sínu í hálfleik þrátt fyrir að vera yfir. Nýju mennirnir komu sterkir inn og Jóhann var ánægður með þeirra framlag.
„Við erum með jafnan og góðan hóp. Þeir sem eru á bekknum eru ekkert síðri en þeir sem byrja og þeir komu flottir inn og stóðu sig vel.“
Eftir þrjá tapleiki í upphafi móts eru Þórsarar komnir á sigurbraut.
„Þetta eykur sjálfstraustið. Við byrjuðum á erfiðu prógrammi og náðum ekki stigi út úr fyrstu þremur leikjunum. Við vorum svona hálf brotnir eftir það en vonandi er þetta til að auka sjálfstraustið hjá okkur.“
Að lokum spurðum við Jóhann út í eigin frammistöðu en hann var besti maður vallarins gegn sínum gömlu félögum.
„Ég er mjög sáttur með minn leik. Ég var ánægður með spilamennskuna hjá mér og liðinu í heild.“
Hægt er að horfa á viðtalið við Jóhann í sjónvarpinu hér að ofan.
