„Ég hef þurft að þola mikið þetta tímabil og þess vegna er ég að tala við fjölmiðla. Mér líður eins og mér hafi verið sýnd vanvirðing," sagði Alves á fréttamannafundi í gær.

„Ég er ekki búinn að ákveða framtíð mína. Ég hef ýmsa möguleika til að velja úr en ég ætla ekki að taka ákvörðun fyrr en eftir úrslitaleik Meistaradeildarinnar.

„Ég veit að félagið vildi ekki gera samning við mig þar til eftir ákvörðun FIFA. Ég er búinn að tala við forsetann og segja honum hvað ég vil. Þetta snýst ekki um peninga, þetta snýst um að vera virtur og metinn að verðleikum."

Alves kom til Barcelona fyrir sjö árum og hefur verið lykilmaður hjá félaginu og unnið deildina fimm sinnum, Konungsbikarinn tvisvar og Meistaradeildina tvisvar. Hann getur bætt tveimur bikurum við safnið á næstu dögum enda eru Börsungar komnir í úrslit Konungsbikarsins og Meistaradeildarinnar.

Þessi orð benda sterklega til þess að Alves sé á förum í sumar þó að, eins og hann segir sjálfur, ekkert sé ákveðið.

„Mér líður eins og ég sé 200% partur af liðinu en bara 10% partur af klúbbnum."