mán 26. júní 2017 09:14
Magnús Már Einarsson
Arnór Ingvi líklega á förum frá Rapid Vín
Arnór Ingvi er líklega á leið í annað félag.
Arnór Ingvi er líklega á leið í annað félag.
Mynd: Fótbolti.net - Hafliði Breiðfjörð
Íslenski landsliðsmaðurinn Arnór Ingvi Traustason er líklega á förum frá Rapid Vín. Austurrísku fjölmiðlarnir Kurier og Laola greina frá þessu í dag.

Samkvæmt frétt Laola er umboðsmaður Arnórs að skoða möguleikana fyrir hann en nokkur félög hafa sýnt honum áhuga.

Arnór kom til Rapid Vín í fyrrasumar eftir að hafa árið áður orðið sænskur meistari með Norrköping.

Meiðsli settu strik í reikninginn á fyrsta tímabili Arnórs í Austurríki en Rapid Vín endaði í 5. sæti.

„Ég hef átt betri tímabil. Það hefur margt spilað inn í. Það voru fjórir þjálfarar og þetta hefur verið smá erfitt. Liðið átti ekki gott tímabil í heild og það hjálpaði mér ekki. Ég vona að næsta tímabil verði örlítið betra," sagði Arnór við Fótbolta.net á dögunum.

Arnór Ingvi er 24 ára gamall en hann hefur skorað fimm mörk í þrettán leikjum með íslenska landsliðinu á ferli sínum.
Athugasemdir
banner
banner
banner