Ejub var ekki sáttur með sína menn í kvöld.
„Ég er mjög svekktur. Mér finnst leikurinn allan tímann í jafnvægi. Fyrri hálfleikurinn var í mjög góðu jafnvægi og seinni hálfleikurinn líka. Svo er ég með nokkra snillinga sem taka ákvarðanir sem ég held að þeir skilji ekki sjálfir," sagði Ejub Purisevic, þjálfari Víkings Ólafsvíkur, eftir 2-0 tap gegn Víkingi R. í Pepsi-deild karla í kvöld.
Lestu um leikinn: Víkingur R. 2 - 0 Víkingur Ó.
„Það er rosalega erfitt að spila í þessari deild ef að þú gerir svona mistök eins og við gerðum í þessum leik."
Ejub var spurður nánar út í mistökin.
„Hafsentinn okkar ákveður að fara upp þegar hann gat sent boltann, hann missir boltann. Við erum að gefa aukaspyrnu, sem fer beint á markvörðinn," sagði Ejub.
„Í seinna markinu, í staðinn fyrir að skalla boltann út, þá erum við að reyna að taka boltann niður í teignum. Auðvitað er völlurinn blautur og það getur verið erfitt."
Það voru fimm menn á bekknum hjá Ólsurum, en það er leyfilegt að hafa sjö menn á bekknum.
„Það eru einhver meiðsli og 2. flokkur var að spila í gær. Þetta er bara svona, í næsta leik verðum við með 18."
Viðtalið má sjá í heild sinni hér að ofan.
Athugasemdir
