Þýska Bundesligan fór aftur af stað í kvöld eftir sumarfrí. Bayern München hóf titilvörnina með stórum sigri gegn Aroni Jóhannssyni og félögum í Werder Bremen. Leikið var á Allianz Arena í München.

Pólski framherjinn Robert Lewandowski var í miklu stuði í kvöld og hann náði að skora þrennu fyrir Bayern München í leiknum. Hinn spænski Xabi Alonso, fyrirliðinn Philipp Lahm og Frakkinn Franck Ribery settu hin mörkin.

Framherjinn Aron Jóhannsson var mikið frá á síðustu leiktíð en hann var í byrjunarliðinu hjá Werder Bremen í kvöld. Hann var tekinn af velli á 64. mínútu þegar staðan var 3-0. Það hjálpaði ekki mikið til fyrir Bremen þar sem heimamenn gengu á lagið og bættu við þremur mörkum til viðbótar.

Lokatölur því 6-0 fyrir Bayern Müncheb og stórkostlegur sigur í fyrsta leik Carlo Ancelotti sem stjóri Bayern. Hann fer ansi vel af stað en það er ekki hægt að segja það sama um Aron Jóhannsson og hans félaga.