Heimild: Morgunblaðið
Kristinn Steindórsson gæti verið á leið í þýsku B-deildina en hann er að skoða aðstæður hjá FSV Frankfurt. Þetta kemur fram á mbl.is í dag.
Hinn 24 ára gamli Kristinn var næstmarkahæsti leikmaður Halmstad á nýliðnu tímabili en samningur hans við sænska félagið er að renna út.
Halmstad vill halda Kristni en hann reiknar einnig með að fá tilboð frá FSV Frankfurt.
„Miðað við hvernig þeir töluðu áður en þeir buðu mér hingað þá býst ég við því. Þeir voru alla vega mjög jákvæðir. Það er búið að fylgjast með mér og þeir vita alveg hvernig leikmaður ég er,“ sagði Kristinn við mbl.is en hann reiknar með að fara frá Halmstad.
„Maður er að leita að næsta skrefi og langar að prófa eitthvað nýtt. Ég vonast til að fá mín mál á hreint fljótlega."
FSV Frankfurt er með 15 stig í 13. sæti af þeim 18 liðum sem spila í þýsku B-deildinni.
Athugasemdir