Hans Steinar Bjarnason lýsir landsleik Kasakstan og Íslands í Astana á morgun en leikurinn verður sýndur beint á RÚV. Um tíma var óvissa hvort leikurinn yrði sýndur vegna fyrirhugaðs verkfalls tæknimanna en nú er ljóst að verkfall verður ekki um helgina.
„Ég er alveg að fara að vinna fyrir laununum mínum hérna. Leikurinn verður sýndur og ekkert vesen heima," segir Hansi. Þó það sé skítakuldi í Kasakstan er leikurinn innanhúss og hlýtt og gott á leikvanginum.
„Ég pakkaði flísbuxum, kuldagalla og öllu því ég hafði ekki fundið þessar tæknilegu upplýsingar um völlinn. Ég er að fara að vera í bolnum."
Hansi er ánægður með gervigrasið og segist hafa gert faglega úttekt með Aroni Einari Gunnarssyni. Aron sé líka mjög sáttur við undirlagið.
Tímamismunurinn milli Íslands og Kasakstan er sex tímar en Hansi hefur verið í vandræðum með að ná áttum.
„Ég er á öðrum degi hérna og sofnaði rúmlega 3 í nótt. Maður þarf aðeins fleiri daga hérna," segir Hansi sem spáir 3-1 sigri Íslands en viðtalið má sjá í heild sinni í sjónvarpinu hér að ofan.
Athugasemdir