Þrír leikir fóru fram í 4. deild karla í kvöld en leikið var í B og D-riðlum.

Í B-riðli fóru fram tveir leikir. Í báðum leikjunum unnust stórsigrar. Augnablik fór illa með Afríku og vann 6-1 og Elliði slátraði Stokkseyri, 8-0.

Augnablik styrkti stöðu sína í 2. sæti riðilsins en Elliði komst með sigri sínum, uppfyrir Stokkseyri og upp í 7. sæti.

Í D-riðli mættust Mídas og Álftanes. Gestirnir í Álftanes byrjuðu betur og komust yfir strax á 15. mínútu en markið gerði Finn Axel Hansen úr vítaspyrnu. Tveimur mínútum síðar skoraði Andri Janusson annað mark Álftanes.

Undir lok fyrri hálfleik fengu Mídas vítaspyrnu og úr henni skoraði Sigurjón Björn Grétarsson. Gunnar Oddgeir Birgisson innsiglaði hins vegar góðan 3-1 sigur Álftanes með marki á 61. mínútu.

Álftanes er að fara illa með D-riðilinn og eru með örugga forystu á toppi riðilsins. Mídas er í 4. sæti.