Riðlakeppni Evrópumóts kvenna lauk rétt í þessu þegar D-riðill keppninnar kláraðist.

Fyrir leikinn var England þegar komið áfram í 8-liða úrslitin. Það kom þó ekki að sök því Toni Duggan kom Englendingum yfir strax á 7. mínútu.

Tíu mínútum síðar jafnaði Carolina Mendes metinn en þetta var hennar annað mark á mótinu. Carolina leikur með Grindavík í Pepsi-deild kvenna.

Í upphafi seinni hálfleik skoraði Nikita Parris og kom Englendingum í 2-1 og lengra komust Portúgalar ekki.

Englendingar sigruðu því riðilinn örugglega með fullt hús stiga og mæta þær Frökkum í 8-liða úrslitum.

Í hinum leik riðilsins mættust Skotland og Spánn. Þar var aðeins eitt mark skorað en það gerði Caroline Weir og tryggði hún Skotum fyrstu stigin á mótinu í sumar.

Þrátt fyrir tapið eru það Spánverjar sem fara áfram. Spánn, Portúgal og Skotland enduðu öll með þrjú stig en Spánn var með bestu markatöluna af liðunum þremur og fara því í 8-liða úrslit. Þar mæta þær sigurvegaranum úr riðli okkar Íslendinga, Austurríki.