„Nýta færin sem við fáum. Við fengum urmul af færum og náðum ekki að nýta færin vel," sagði Rúnar Páll, þjálfari Stjörnunnar er hann var spurður hvað vantaði upp á í tapi sinna manna gegn ÍBV í undanúrslitum Borgunarbikars karla í kvöld.

Þrátt fyrir tapið var Rúnar nokkuð ánægður með spilamennsku Stjörnunnar í dag.

„Við spiluðum ágætlega en þeir komust aðeins inn í þetta síðasta korterið í fyrri hálfleik. Fram á okkar marki vorum við með leikinn. Við byrjuðum af feiknargóðum krafti í síðari hálfleik."

Rúnar var hins vegar afskaplega óánægður með mörkin sem Stjarnan fékk á sig í kvöld.

„Við fáum bara tvö hrikalega aulaleg mörk á okkur og þá má bara ekkert. Það er hrikalega svekkjandi. Þetta var hrikalega dapurt af okkar hálfu."

Stjarnan og ÍBV mætast strax aftur á sunnudag og ætla Stjörnumenn að vinna þann leik.

„Við verðum svekktir í kvöld en síðan mun undirbúningur hefjast á morgun og laugardag og við mætum tvíefldir til leiks."