Ludogorets Razgrad frá Búlgaríu tryggði sér farseðil í riðlakeppnina í Meistaradeildina í fyrsta skipti á ótrúlegan hátt í kvöld. Liðið sló þá Steaua Búkarest út eftir framlengdan leik og vítaspyrnukeppni.
Markvörður Ludogorets fékk rauða spjaldið á næstsíðustu mínútu í framlengingu og þar sem liðið var búið að nota allar skiptingarnar fór varnarmaðurinn Cosmin Moti í markið.
Moti er frá Rúmeníu og hann átti eftir að leika landa sína í Steaua ansi grátt.
Moti skoraði úr fyrstu vítaspyrnunni í vítaspyrnukeppninni og varði síðan tvær til viðbótar. Það dugði til að tryggja 6-5 sigur þar sem Búlgararnir misnotuðu einungis eina spyrnu.
Óhætt er að segja að fögnuðurinn hjá Moti hafi verið ósvikinn þegar hann greip síðustu spyrnuna en hann tók hlaupið upp í stúku og fagnaði vel og innilega með heimamönnum. Hreint út sagt ótrúlegt ævintýri.
Smelltu hér til að sjá brot úr leiknum af vefsíðu Vísis
Athugasemdir