Jason Puncheon, leikmaður Crystal Palace, tekur því væntanlega ekki fagnandi að fá Warnock til starfa eftir ummæli sín fyrr á þessu ári.

Warnock sagði í sjónvarpsþætti að Puncheon væri léleg vítaskytta og þau ummæli féllu vægast sagt ekki vel í kramið hjá leikmanninum.

,Eftir lélega vítaspyrnu þá get ég hlustað á skoðanir fólks og tekið stríðni eins og hjá @mattletiss7 á @talksport í morgun," sagði Puncheon á Twitter í kjölfarið.

,,Ég mun hins vegar ekki hlusta á mann sem er spilltur og er að eyðileggja leikinn. NEIL WARNOCK, maðurinn sem kaupir leikmenn og gefur þeim aukalaun og pening fyrir spilaða leiki til þessi að þeir borgi honum síðan fyrir að vera í liðinu eða á bekknum."

,,Sú staðreynd að hann hafi verið að tjá sig um æfingar er ótrúleg því að hann var aldrei mættur sjálfur á æfingasvæðið."

Puncheon eyddi færslunum af Twitter en það var of seint því hann fékk sekt upp á 15 þúsund pund fyrir ummælin.

Gaman væri að vera fluga á vegg þegar Warnock mætir á svæðið hjá Crystal Palace og hittir Puncheon á nýjan leik.