Paragvæski markahrókurinn Roque Santa Cruz er genginn til liðs við Malaga frá Cruz Azul í Mexíkó.
Aðeins eru átta mánuðir síðan Santa Cruz yfirgaf spænska liðið fyrir Cruz Azul þar sem hann fékk risasamning og var launahæsti leikmaður mexíkósku úrvalsdeildarinnar.
Santa Cruz skoraði fjögur mörk í tíu leikjum fyrir Cruz Azul.
Þessi 34 ára framherji verður á láni hjá Malaga út leiktíðina en hann gerði 21 mark fyrir félagið á tveimur og hálfu tímabili og er í miklum metum hjá stuðningsmönnum félagsins.
Santa Cruz hefur meðal annars leikið fyrir Bayern Munchen, Man City og Blackburn á ferli sínum auk þess að eiga 106 landsleiki fyrir Paragvæ.
Athugasemdir