Nú fer senn að styttast í annan endann á þessu skemmtilega fótboltasumri, en þetta er aldeilis ekki búið enn. Í dag er nóg um að vera, það er leikið í tveimur efstu deildunum hjá körlunum sem og í neðri deildunum.

Aðalleikur dagsins er grannaslagur Breiðabliks og Stjörnunnar í Pepsi-deild karla. Bæði lið eru með 27 stig og vonast til þess að setja einhverja pressu á topplið FH sem er í ansi vænlegri stöðu á toppi deildarinnar á þessari stundu.

Í Inkasso-deildinni lýkur 18. umferðinni með þremur leikjum. KA-menn geta komist aftur á topp deildarinnar með sigri á HK og vinni þeir leikinn verða þeir í ansi góðum málum með það að komast upp í Pepsi-deildina. Leiknir F. og Huginn mætast í fallbaráttuslag og á sama tíma mætast Þór og Fjarðabyggð.

Það eru svo fjórir leikir í 2. deild karla og þar getur Magni frá Grenivík meðal annars sett pressu á Gróttu og Aftureldingu í baráttunni um að komast upp með ÍR. Magni mætir Vestra og þeir þurfa sigur þar. Það fer einnig fram heil umferð í 3. deild karla og svo ljúka nokkur lið keppni í 4. deild karla.