Sirigu er ítalskur markvörður sem hefur undanfarin ár varið markið hjá PSG. Hann mun nú halda til Spánar og spila með Sevilla. Hann kemur til Sevilla á láni út þessa leiktíð.

Hinn 29 ára gamli Sirigu var aðalmarkvörðurinn hjá PSG fyrir síðustu leiktíð, en þá var fjárfest í þýska markverðinum Kevin Trapp. Sá gerði sér lítið fyrir og hirti sætið af Sirigu sem hefur nú eins og áður segir verið lánaður til Sevilla þar sem hann mun spila á þessari leiktíð.

Það komu aðrar fréttir frá PSG á svipuðum tíma þar sem miðjumaðurinn Benjamin Stambouli hefur verið seldur til Schalke 04 í Þýskalandi.

Stambouli var keyptur til PSG frá Tottenham síðasta sumar og hann kom við sögu í 27 deildarleikjum á síðustu leiktíð. Hann er þó ekki í áætlunum hjá nýjum stjóra, hinum spænska Unai Emery.

„Ég hef haft miklar mætur á þessu félagi síðan ég spilaði gegn því í Meistaradeildinni árið 2012. Ég held að Bundesligan sé besta deildin fyrir mig," sagði Stambouli eftir að kaupin gengu í gegn.