Þýska úrvalsdeildin, Bundesligan svokallaða, er aftur byrjuð að rúlla eftir sumarfrí. Opnunarleikurinn var í gær þegar Bayern München fór illa með Werder Bremen, en nú fyrir stuttu var fimm leikjum til viðbótar í fyrstu umferðinni að ljúka.

Helstu keppinautar Bayern München um titilinn eru Borussia Dortmund og þeir mættu Mainz á heimavelli. Í þeim leik reyndist Dortmund sterkara og að lokum fór svo að heimamenn unnu 2-1 sigur. Pierre Emerick Aubameyang setti bæði mörk Dortmund í leiknum, en hann ætlar að berjast við Pólverjann Robert Lewandowski um markakóngstitilinn í Þýskalandi. Lewandowski setti þrennu í gær.

Wolfsburg byrjar á 2-0 sigri, en þeir unnu Alfreð Finnbogason og félaga í Augsburg. Daniel Didavi skoraði fyrsta markið á 35. mínútu og bakvörðurinn Ricardo Rodriguez var svo á ferðinni þegar lítið var eftir. Alfreð byrjaði leikinn hjá Augsburg en hann var tekinn af velli á 63. mínútu.

Að öðrum úrslitum má nefna það að Eintracht Frankfurt vann nokkuð óvæntan sigur á Schalke 04 þar sem Alexander Meier, sóknarmaður Frankfurt, skoraði og klúðraði vítaspyrnu. Köln hafði betur gegn Darmstadt og þá skildu Hamburger og Ingolfstadt jöfn á heimavelli fyrrnefnda liðsins.